Mir si de wider is Billabong Hostel gange. Dr Camper hei mir problemlos chönne zrügg gä. Hei nä ja o sehr suber putzt. Ds 4er-Zimmer hei mir üs mit ämne New Zealander und ämne Irländer teilt. Die zwe hei de möge schnarchle das nüm schön isch gsi. D Silvia het mi schön tuuret, i bis mir ja vom Dienst gwöhnt u ha fasch ke Problem ka. Ds Perth si mir flissig ga lädele. Znacht hei mir üs de meistens im Restaurant gönnt. Dr Kingspark si mir no ga erchunde u natürläch no angeri schöni Plätz ds Perth. Unger anderem simer no mit dr Fähre uf Rottnest Island gfahre u hei dert ä ca. 20km Velotour gmacht. Im Hostel hei mir no dr Yves vo Züri u dr Damian us Italie kenneglehrt. Zwe flotti Bursche. Mit ihne simer ono am Cottesloe Beach ad Sunday Session gange. Zersch ga bade u nä no eis ga zie. Schlussändläch zrügg is Hotel u nä no ga zäme ässe.