Hüt simer schnäu zu Hertz ds Albany gange um das wäg äm Schade ds kläre. Söt auso guet cho. Nä simer richtig Perth gfahre. Uf äm wäg no ds Tornadirrup gad Natural Bridge und The Gap ga bestune. Super Wätter gsi. Da mir ke passendi Ungerkunft gfunge hei ufäm Wäg nach Perth, simer unglücklächerwis id Nacht inegfahre. Prompt hei mir Kangurus am Strasserand gse u eis isch sogar voräm Outo düre gumpet. Schlussändläch simer ds Busselton acho womer imne Hostel hei chönne übernachte. Isch zwar scho zuegsi, aber mä het chönne ufnes Natel vom Chef alüte u so hei mir doch no äs Zimmer bächo. Dert hets ä huffe lustigi u flotti Backpackers ka, wo üs sogar no zum Bier iglade hei.