Hi zäme,
wi atönt hi mer gester as Outo gmietet u si bis i d Houptstadt Lapplands - nach Rovaniemi - gfahre. Dass si rund 130km ei Wäg. As isch a super Entscheid gsi z Outo z miete. Zersch simer überna "Pass" gfahre, wo d Büüm würkli no ganz wiss si gsi so dass mer as Büud hi übercho wis hie normalerwis usgsehti - hammer!. Nai simer de verschniite Strasse nagfahre i Richtig Süde. Bim Olkkajärvi-See hi mer a Pousa gmacht. As isch herrlech Sunneschyn gsi. Nai si mer de Samichlous ga bsueche, wo sis Büro am Polarkreis churz vor Rovaniemi het. Mi si ja früecher beidi scho mau hie gsi u hi is eigentlech gschwore nie me a dä Touri-Ort z cho, aber we mu scho am dedürfahre isch ;-) Zudäm isches im Winter bi Schnee vüu weniger schlümm aus im Summer. Mi hi no a Rentierburger gässse u si nai ids Zentrum vo Rovaniemi gfahre. D Stadt het epa 60000 Iwohner u z Wahrziiche isch di grossi Brügg übere Fluss. De Fluss isch im Winter gfrore u as het Schneemobil u Langluufpischtene druf (ussert grad de Tiu zwüsche de zwone grosse Brügge isch nid frigä wüu z Iis z dünn isch). Mi si chly ga luufe u nai no is Zentrum ga as feins Käfeli ha, bevor mer üs umi uf d Rückfahrt gmacht hi. Müed vo de Reis simer im Hotäu acho, hi no epis gässe u si scho ufem Wäg ids Bett gsi, wo de Nordliechtalarm losgange isch. Auso ab id Skikleider u so schnäu aus möglech voruse uf z Moor, u tatsächlich, es chlyses Nordliecht hi mer gseh!!! Hüt morge am 9i himer nai z Outo umi müesse abgäh. Hüt isches scho de ganz morge am schniie u gemäss Wätterpricht hörtes hüt gar nid. Hi auso d Hoffnig uf wissi Büüm no nid ganz ufgä :-) As wott o umi chäuter hie, am Fritig schyns -15 Grad. Liebi Grüess